كل حاجة حصلت بسرعة اوي...عرفت الجمعة بالليل اني مش هينفع اقضي السبت الصبح في البيت فكان لازم ادبر أي نزولة بسرعة ...و فجأة عز –صديقي الفنان- اتصل بيا ..فضلنا نتكلم شوية مع بعض و بعدين اقترحت ننزل بكرة الصبح نروح اي حتة ...قاللي فين يعني ؟؟؟ قلتلة اية رأيك نروح ميدان العتبة و شارع الازهر و الحتت دية ؟؟؟؟ صراحة ...انا كنت سمعت ان هناك في حاجات كتيرة و رخيصة بتتباع هناك و كنت باروح و انا صغير اوي مع بابا ..بس الكلام دة من زماااان ..قلت اروح اتفرج و أشوف ..المهم بسرعة اتفقنا ..و حددنا هنتقابل امتى وفين ..........
الصبح اتقابلنا ...ركبنا المترو من محطة السادات لحد محطة العتبة ..و مع خروجنا من باب المترو بدأ اليوم فعلا...
كان أول حاجة عدينا عليها هي سور الازبكية ...أنا كنت رحتو كذا مرة ..فانطلقنا انا و عزززووززز صوب ميدان العتبة مباشرة ...سألنا نمشي منين بالضبط ..مافيش دقيقتين مشي و لقينا نفسنا هناك ...انا عرفتو على طول من العمارة اللي فوقها تمثال الكرة الارضية شايلها 4 بني ادمين ...كنت باحب التمثال دة أوي و انا صغير ..و كنت لما باروح مع بابا و عمي للميدان بابقى منبهر لما أشوفه ....أينعم دلوقتي في بوستر كبيير جدا للأخ "عصام الحضري" و اعلان فودافون النجم ...بس انا متأكد ان الناس اللي بتبص علي التحفة الفنية الجميلة دية اكتر بكتير أوي من اللي شاغلهم عصام الحضري و فودافون !!
عايشين في دور الرحالة ..مشينا "الهوينى" – زي ما بيقولوا في الفصحى - .....مرينا الاول علي محلات الاجهزة الكهربائية و الالكترونيات ...بعدين شفنا بتوع الشنط و مستلزمات السفر ....و لكن محلات الأقمشة و المفروشات كان لها النصيب الاكبر من الشارع حتى الجامع الازهر تقريبا ..وبعد حاجة بسيطة لقينا نفسنا قدام جامع الحسين , فعبرنا للضفة التانية من الشارع ...ودخلنا في شارع طويل من شوارع القاهرة القديمة بكل بهاءها ... كل المحلات في الشارع تبيع مستلزمات الحلاقيين ..و على الرغم من كثرة المحلات ..فان المساجد و البيوت الأثرية ذات الطراز الاسلامي الرائع كانت مالية الشارع ..كنت ماشي و انا حاسس اني مش بس باتحرك في المكان ..لأ كمان باسافر في الزمان و انا بتفرج على جدودي اد اية كانوا فنانين ...باحسدهم على راحة البال و المزاج اللي كانو فية عشان يعملوا أماكن عبادتهم و شغلهم و حتى أماكن نومهم بالجمال و الروعة دية ...
ماكونتش عايز امشي من المكان الجميل دة و اقترحت على عز ان احنا ندخل جوا اكتر مع ان المحلات كانت تقريبا خلصت و بعد كدة منطقة سكنية عادية ..بس صدقوني اللي يلاقي نفسة في الجو الجميل دة مايبقاش عايز يسيبه أبدا ...المهم ماعداش اكتر من 3 دقايق الا و كنت باندم على اننا دخلنا جوة اوي كدة .....
لأ لأ مش عشان مابقاش فية مساجد تاني أو الاثار الاسلامية موجودة ولا حاجة ..بالعكس دوول موجودين بنفس الكثافة اللي كانو بيها برة و يمكن اكتر ..المصيبة في كمية الجرايم اللي الناس عملاها حواليها ..تصوروا معايا المشهد ...جوامع و بيوت عتيقة بقى لها ييجى اكتر من 500 سنة ..كانت في يوم من الايام منابر للعلم و الدين ..نيجي في سنة 2006و نلاقي على جدرانها الناس ساندة مشنات – جمع مشنة – الخضار و الفاكهة ..او محلات ملاصقة ليها بتاعت فول و طعمية و الزيت عامل عمايلة .. أو والله فعلا بلا مبالغة محل سمك ني فاتح في الجامع – الظاهر ان زمان كان بيبقى فية حوانيت ملحقة بكل جامع – دة غير القهاوي اللي فارشة الكراسي على حيطان الجوامع ..اما الطامة الكبرى بقى لما جت عربيتين أحدهما نص نقل في وش بعض ...في شارع عرضة لا يزيد عن 3 متر !!!! يعني احنا ياللي ماشيين على رجلينا وقفنا أصلا مش لاقيين مكان نمشي منة !! بجد منظر محزن والله ...الشارع دة لو في أوروبا كانوا حنطوه ! للدرجة دية فقدنا احساسنا بقيمة كل حاجة ؟؟؟للدرجة دية ؟؟؟......ما علينا ..ربنا كرمنا وقدرنا ندخل في شارع جانبي أضيق و أضيق ..بس نضيف بطريقة تثير الريبة ...بس اهو ادينا فكينا من الزنقة دية و خلاص ....اة نسيت قبل ما أسيب الشارع لقيت يافطة عتيقة علي الشارع مكتوب عليها ( شارع الجمالية) ..ياة الجمالية !!! أسمع عنها من زمان بس عمري ما شوفتها ...بس هاقول اية ...حسبي الله و نعم الوكيل في اللي كانو السبب !!
"اشمعنى يعني الشارع دة هوا اللي نضيف و متزبط أوي كدة" تساءلنا و احنا ماشيين ...و مافيش ثواني الا و عرفنا السبب ..لقينا على يمينا "بيت السحيمي" ...كانت صدفة مش متوقعة بس جميلة اوى في نفس الوقت ...انا كنت سمعت عنة انهم بيعملوا فية ندوات و حفلات و كدة بس للاسف معرفش مين هوا "السحيمي " بالضبط ...المهم دخلنا بجد كان جميل جدا من جوة ..انا كنت منبهر بشكلة من برة ..بس فعلا من جوة حاجة تفوق الوصف ...هوة مبدئيا كبير اوي و مليان قاعات دة غير انة دورين غير الارضي .. وفي وسط كل ساحة مكشوفة جنينة صغيرة ...اما القاعات نفسها فكفاية اني اقول اني حسيت راحة مش طبيعية أول ما دخلت القاعات ...الاثاث بسيط اوي ..معظمة سجاد يدوي و كراسي ارابيسك ..بس بجد تحس انك ممكن تقعد طول عمرك هنا ماتخرجش لدرجة ان احنا قعدنا نلف فية و بابص في الساعة لقيت مر علينا ساعة و نص و احنا مش حاسيين ..مهما اوصف مش هاوفي المكان دة حقه ..ادرجة ان صدبقي الفنان صور اكتر من 30 صورة جواة ..و الحلو بقى ان احنا كنا ماشيين من غير ما حد يقولنا رايحين أو جايين منين ..بس الموضوع دة كان ليية عيب ان محدش قلنا اي معلومات عن البيت ..و لحد الان انا معرفتش مين السحيمي دة بردو !!!!!
بعد الاستمتاع اللي حسنا بية عند عمو "السحيمي" مشينا في طريقنا في اتجاة الرجوع و ما هي الا ثوان حتى وجدنا انفسنا في اكبر شوارع القاهرة القديمة ...شارع السلطان الغوري سابقا .. "شارع المعز لدين الله الفاطمي " ........
في أسوأ كوابيسي ماتخيلتش اللي شوفتة بعيني ...انا اسمع من زمان ان الشارع دة متحف مفتوح ...مليان اثار اسلامية
و مساجد و بيوت دة غير محلات التحف و كدة ...بس كنت قريت في مجلة العربي الكويتية في عدد يوليو حالتة بقت سيئة جدا و محتاج حد يهتم بية بس بردو ماكنتش متصور الوضع "مزري" لهذة الدرجة ....
أولا الشارع نفسة منخفض عن المحلات و الشوارع اللي حواليه بحوالي متر تقريبا يعني و مافيش مثلا سلالم ولا كلام من دة يعني ممكن و انتا نازل كدة ربنا يكرمك بدراع او رجل مكسورة دة غير ان الناس العواجيز للاسف كانوا بيطلعوا على ايديهم و رجليهم عشان مايقعوش !
كل دة في كفة و الزبالة في كفة تانية ....في شارع الجمالية كنت متضايق قال اية عشان الخضار و السمك و القهاوي ...أما بقى في شارع المعز فالوضع "اشنع" بمراحل ...يا اسيادنا حد يصدق ان يبلغ من العمر مئات الاعوام ..ويا ريتة مبنى عادي ...دة جامع ! جااااااااااامع !!! و قدامة تشكيلة من مختلف انواع الزبالة مرصوصة في شكل فني جميل على هيئة هرم رباعي – يمكن عشان يبقى فية جو فرعوني في المكان _ و يا ريت قدامه بس دة من جميع الجوانب ...و تتبوأ ( حلوة تتبوأ دية صح ؟ ) الزبالة مكانها في مختلف انحاء الشارع والناس قدام محلاتها قاعدة ولا فية اي مشاكل !!! دة غير اعمال الحفر اللي شغالة واللي ماقدرتش افسر اية الهدف منها بالضبط بردو ؟؟؟!!!!
على الرغم من ان كان فية اماكن انضف –نسبيا- بعد كدة في الشارع و دة طبيعي لان الشارع طويل جدا بس انا كانت نفسي اتسدت من اللي شفتة..طب اذا كان شارع المعز اللي هوا اهم شارع في القاهرة الاسلامية حالته كدة ...يبقى اية الوضع في بقية الشوارع ؟؟؟؟طب هوا دة غلط الناس ولا الحكومة ؟؟؟ طب الاجانب اللي بيشوفوا المنظر دة يقولوا اية علينا ؟؟؟؟ و مش اي اجانب اللي بييجوا الشارع دة ...كفاية مثلا اقولكوا ان هيلاري كلينتون طلبت تزور الشارع دة بالاسم اول مرة جت مصر !!!! وبعد كدة نزعل لما يقولوا علينا متخلفين ؟؟؟أمال يشوفوا الكلام دة و يقولوا اية ؟؟؟؟؟؟؟؟؟سرياليين مثلا !!!!
في نفس طريق الذهاب رجعت , و مافيش في دماغي غير كلمة واحدة ..حقيقي.. لك الله يا مصر !!!!!!!!
1 comments:
جولة جميلة
جرب برضه تزور الدرب الأحمر .
بس الجمالية فعلا هي الكنز الأكبر :)
Post a Comment