عن السجاير والهندسة

دايما باميل اني افسر كل حاجة اعملها تفسير منطقي...يعني ..احدد أسباب كل حاجة بعملها..مش عشان حاجة معينة بس يمكن عشان صورتي قدام نفسي..اهو احتفظ بقدر معين من احترامي لنفسي..و مابقاش قدام نفسي عبيط او هوائي..مع اني عارف اني هوائي ..و هوائي جدا كمان ..و يمكن هوا دة السبب اللي دايما بيخليني أدور علي سبب كل حاجة ...فية واحد صاحبي مرة قاللي انتا معتز بنفسك زيادة عن اللزوم !..و مرة واحد تاني قاللي انتا قاسي اوي على نفسك ...يا سسلام !!...مش عارف يمكن كلامهم صح !!! و يمكن بردو دية تكون من ضمن الاسباب اللي بتخليني أفكر كدة !!
يعني النهاردة مثلا ..رجعت أدخن تاني... كانت اول سيجارة اشربها ييجي من شهر و اكتر ...بس من أول سيجارة و انا بسأل نفسي أنا بادخن لية ؟؟؟؟؟؟!!!
السجاير فعلا مالهاش أي فايدة ...كلها عيوب ...بتضيع الفلوس والصحة و كمان بتخلي ريحة الواحد لا تطاق ! طب مادام انا عارف كل دة باتنيل باشرب لية؟؟
من وانا صغير باحب ريحتها اوي...مع انها كانت بتوجع صدري جدا ...و كان بيجي زمان واحد صاحب بابا يديني درس رياضة ..كان يقعد معايا ساعتين أو اكتر مايبطلش يشرب سجاير ..يمكن من وقتها انا حبيت ريحتها ..بس بعد ما كان بيمشي كان صدري يفضل واجعني يومين مثلا ...بس عمري ما اتجرأت و شربت ...حتى في ثانوي ..يمكن عشان صحابي ماكانوش بيشربو ..بس الارجح اني عشان كنت عايش في الدور المتفوق المثالي و لو كنت عملت حاجة زي دية كانت كل المدرسة اتكلمت عليها !!
لما دخلت المخروبة بقى ( اللي هيا هندسة طبعا) كنت في اعدادي لسة بردو مصدق الوهم و عايش الدور ومع ان نتيجة اعدادي كانت أول قفا جامد اخدو في الكلية لدرجة انها يمكن تكون من اكتر الحاجات اللي غيرتني في الكلية الا ان موضوع السجاير دة بردو كان برة تفكيري خالص ...يمكن عشان ظروف وفاة بابا في نفس السنة ..
في اولى فضل الوضع على ما هو علية ...و نفس الحكاية في الترم الاول في تانية ...ليغاية لما جة وقت النتيجة ...نتيجة الترم الاول ..و شلت "رياضة" !! الرياضة اللي ماكونتش باقل اكتر من 3 درجات في اصعب امتحان فيها ...و كان ساعتها وقت مثالي للتدخين و كان ممكن اتحجج اني قرفان و معايا عذري ... بس الصراحة الالم النفسي الرهيب اللي كنت حاسة ماكنش مخليني افكر في حاجة خالص غير في المرمطة اللي شفتها و بشوفها في الكلية !!!
و فضل الوضع على ما هو علية في بقية تانية و اول تالتة خصوصا و ان ربنا كرمني و رفعوا الرياضة الحمدللة ...
مع أواخر الترم الاول في تالتة كنت فعلا أيقنت أن انا عملت جريمة في حق نفسي لما دخلت هندسة ...لا دراسة عجباني..ولا مجالات الشغل لاقي فيها نفسي ..بالاضافة كمان الى ان 99% من الطلبة لا يمكن أن تتعامل معاهم بصورة طبيعية ...يمكن انا ببالغ شوية ...بس حقيقي الشعور دة زاد عندي بصورة كبيرة اوي خصوصا بعد ما اشتركت في "نموذج الاتحاد الأوروبي IMEU" في سياسة و اقتصاد و الحمدلله نجحت في ال INTERVIEWو كمان كنت من اهم الاعضاء في اللجنة اللي كنت فيها- بشهادة رئيس اللجنة- مع اني كنت من برة سياسة و اقتصاد و دية كمان كانت اول مرة ليا ...
المهم بعد اخر MIDTERM EXAM في الترم كنت وصلت لاخري و بدأت أدخن فعلا ...كنت في الأول باخد سجاير من واحد صاحبي في الكلية و استمرت على الوضع دة لفترة طويلة ...و شوية ابطل و انسى الحوار خالص و شوية ارجع تاني حسب التساهيل .. بس أول سيجارة جبتها بنفسي كانت في الامتحانات اللي فاتت يعني من شهرين كدة كنت قبلها كل ماشوف صاحبي اخد منة ..كنت محبط لاقصى درجة ...لاسباب كتيرة أوي ..و فترة الامتحانات دية شربت كتير اوي لدرجة ان اخر مرة جبت علبة شربت منها 5 سجاير في أقل من ساعة ...بعد الامتحانات ما خلصت بطلت خالص.....الغريب بقى اني مابقدرش اخد الدخان على صدري اصلا و لو حصل صدري بيوجعني و اقعد اكح و تبقى فضيحة !..يعني زي ما بيقولوا "بانفس".. بس شكلي كدة هاكمل في السكة دية ..لاني دلوقتي حالا عايز سيجارة !!!!!!!!