Tuesday, September 19, 2006

بين السبتمبرين

سبتمبر 2002
طالب متفوق خارج من ثانوية عامة ...مصدق نفسه و عايش الدور ....نزل يشتري هدوم و أدوات و قعد يحضر نفسه يجي من قبل الدراسة بشهر ...متشوق للجامعة و كل ما فيها ....."دخلت ايه يا (...) " ..برد بكل فخر و اعتزاز " هندسة القاهرة" ... يملأ عقله الأحلام الوردية و كلمات من نوع " شد حيلك بقى في المذاكرة عشان التقدير"....." خد الموضوع جد من الأول عشان التراكمي بتاعك " ....." اتعب شوية في الأول و انتا تتعين معيد بعد كده" ......مش عارف ينام ليلة أول يوم دراسة ...زأول مرة في حياته يبقى عنده دراسة يوم السبت ..بس من كتر التفكير مش عارف ينام ....بيفكر في كل حاجة ....الصحاب اللي لسه معرفهومش ...المواد اللي لسه ما درسهاش ...الدكاترة ....الرسم الهندسي اللي كان بيمثل انه بيعمل زيه من و هوا في ابتدائي ....كل حاجة ...حتى في البنت اللي لسه ماحبهاش ...
صحي الصبح قبل المعاد ييجي بساعتين ...لبس كله جديد في جديد ...غرق نفسه في البرفان ...و شوية جيل في اللذيذ ....امال ايه ...مش"الانطباعات الأولى تدوووم " ....تصحبه دعوات الحاجة نزل من البيت .. متفاءل بالايام الجميلة اللي جاية ....
سبتمبر 2006

رجع من السفر قبل الدراسة ب 3 أيام ....مكانش ناوي يروح أول أسبوع كله أصلا ...الزحمة و الحر و القرف ...دة غير حكاية ان كله أجزته بقت السبت ده معنى كدة الكلية هتبقى عجن ...بس حظه بقى ان معاده مع الدكتور بتاع المشروع طلع في نفس اليوم فاضطر يروح ....و لا ليه نفس يشوف حد من دفعته الكئيبة ...ولا حتى صحابه "المزعومين " ...و الدكاترة طبعا هما هما بتوع القسم اللي شبع منهم طووول السنين اللي فاتت ....و لا فيهم حد يتحضر له أصلا ...هو الورق و بس ....و لا بقى عيال اعدادي بقى اللي جايين فرحانين بنفسهم و كل و احد لابس اللي على الحبل و نازل ...ولا بتوع أولى اللي عمالين يتريئوا على بتوع اعدادي و هما مغفلين أكتر منهم أصلا عشان قعدوا سنة ياخدوا على قفاهم و لسه ماحرمووش ....و كل كووم بقى و الناس النص معرفة دووول كووم تاني ...يعني و لا هما صحابك و لا هما مش صحابك ...متعرفش تسلم عليهم و لا ماتسلمش و شغلانة بقى ...دة غير طبعا بنات هندسة الفاتنات ...و حط 1276 خط تحت فاتنات دية .........المهم لبس أقرب حاجة و قعت عليها ايدة من الدولاب و راح متوكل على الله و نازل ,,و مافيش في دماغه غير جملة واحدة أهي كلها سنة و هتعدي "

10 comments:

Lasto-adri *Blue* said...

.و لا بقى عيال اعدادي بقى اللي جايين فرحانين بنفسهم و كل و احد لابس اللي على الحبل و نازل ...ولا بتوع أولى اللي عمالين يتريئوا على بتوع اعدادي و هما مغفلين أكتر منهم أصلا عشان قعدوا سنة ياخدوا على قفاهم و لسه ماحرمووش


loooooooooooooooooooooooooooooooooooooooooooooooooooool

بس ايه موضوع فاتنات دى يا استاذ

فاتنات غصب عن الكل بقى
وبيعضوا على فكرة

Nouran said...

وبتتريق ع بتوع اعدادي ليه بقى ما احنا زي الفل يا هندزة انت بس شكل عقدتك من الكلية بتوسع بس تعرف انا لبستش اللي ع الحبل ومعملتش اي حاجة من اللي انت بتقول عليها ورجعت قبل الدراسة بيومين من المصيف عاااادي خااالص عالم تنحة يعني بس انت بس ركز ف التخرج مش انت بكالريوس السنة دي ولا ايه ؟؟ هو انت من اللي ببيبقوا قاعدين لوحديهم قرفانين تحت الشجر دول ولا ايه ؟؟
ربنا يكرمك يا بني تعبت اعصابي اسلملك ع شهوار :)

saso said...

القاعدة بتقول ماتروحش الجامعة اول اسبوع والا هتبقي زي عسكري المرور والناس عمالة تسالة علي خمس تلاف مكان كانة مولود هنا
غير كرنيفال الهدوم الفظيع بتاع اول يوم كانك في برنامج يلا بينا بتاع الاطفال

اخر سنة مش هتبقي كدة انا عندي كانت احلي سنة وكان عندي استعداد ابقي عسكري مرور كمان.. عارف لما تمشي السنة كعد تنازلي بتتمسك بيها اكتر

Captain L.J.Silver said...

Lasto :
Fatenaaaaat 3`asben 3anny tab3an ya handsa ..howa ana a2dar afta7 bo22y !!! : ))))))))) 2amma men na7eyt bey3oddo deeh fa homma bey3oddo we ye7`arbesho we kol 7aga !


Nouraan :

LOOOOOOOOL gamda 7ekayet bet3od ta7at el shagra deeh : ))) ......ha2ollek a b2a ...bardo mahama hat2olly enty wa7da men e3dady far7ana be nafsaha we lessa shayfa el donia wardy bas kaman sanatain hateftekry el kalam elly ba2oholek kollo : )))

P.S : Dr.Hany a7san be keteeeer men shahwar 7awly te7dreeloh ......we ya salam law te7dary le Dr. Elmessairy fe elPhysics bgd ya nouran da a7san doctor fe el kolleya kollaha .....we ay y 7`edma ya fandem e7na ta7t amrek :)))

Captain L.J.Silver said...

Saso :
wallahy ya saso I hope ...bas Eversince I joined Handsa mashoftesh sana 3edla fa mesh mota2kked el sana deeh mo mken tekoon 7elwa walla la2 !!!! 2oly ya rab !

sarah la tulipe rose said...

فعلا دة برضة نفس احساسي اول يوم نفس الوشوش الي تشوفها و مش عاوز و الي يضحك في و شك و ما تلحقش تمشي خطوتين الا و تسمع بودنك شتيمة فيك منه برضة! و كله كوم و الاجازة الموحدة بتاعت السبت دي فعلا حاجة تغيظ! بس يا بختك انت بتقول سنه و تعدي و انا بأول تلاته و يعدوا
هانت برضة اية يعني تلات سنسن في عمر الكوكاب و المجرات!

abderrahman said...

كان الله في العون..
اهي سنة وتعدي
:)
بس عايز نصيحة
حاول تحضر نفسك لما بعد انتهاء الدراسة
لإنك حتلاقي الدراسة خلصت
والحياة العملية في وشك على طول
كورسات .. تدريب .. كده
ده أهم من الدراسة
يلا ارحل بقى عشان تعليقي اكيد زود الاكتئاب
:))
ربنا يوفقك

Ensan said...

ياراجل , ده مشن بين سبتمبرين , ده بين عالمين , عالم واحد لسة شايف المستقبل قدامه , الروقان , وعالم واحد ازازة السفن اب بتاعته خلصت ومش عارف يعمل ايه
وبعدين ماتغلطش , خد بالك بتوع هندسة ( بالذات اعدادى ) مالين المدونات , يعنى حاسب على كلامك لتتخطف

Anonymous said...

:)

طب لو سمحت بقي ماتتبطرش ع النعمة و اجازة السبت.. عشان انا واحدة معنديش اجازة خااااااااالص..و حتي الجمعة.. مش عايزة اقولك ح نستلفه و نعمل بيه ايه يعني ههههه

الحمد لله علي كل شئ
اللهم لا اعتراض

يا عمنا ربنا معاك و شد حيلك
هااااااااااااااانت
اخر سنة
استمتع بيها غصب عن الجميع

كل سنة و انت طيب

يا مصر اكتب إليكي رسائلي said...

تحياتي ولحد عندكم جي اقول
بمناسبة الشهر الكريم كل عام وانتم والأسرة الكريمة وكل الأصدقاء والأحباب بالخير ومصرنا الحبيبة كلها بالخير واليمن والبركات