منذ 6 أسا بيع بدأت رحلتي مغ المدونات و المدونين ...و على الرغم من أن هذة الفترة تعتبر فترة قصيرة جدا في عالم المدونات ..الا اني أقدر أقول ان انا فعلا لو ماكنتش احتكيت بعالم التدوين كان هايفوتني كتير ...كتير قوي ...
الحقيقي انا مش هتكلم عن المدونة بتاعتى أو عن المواضيع اللي باكتب فيها ....لا لأ .....أنا عايز أتكلم عن المدونات و المدونين اللي بقى لي شهر و زيادة بازور صفحاتهم .....فعلا كانت –و مازالت- رحلة رائعة ......
كانت الفكرة الأساسية في دماغي عن البلوجرز المصريين هي أنهم في الأساس بيتكلموا عن السياسة .... دة يمكن بسبب الاعتقالات اللي حصلت لعلاء و الشرقاوى و المظاهرات اللي بينظموها و كده ...أو عن الأدب و الشعر و كده ...بس فعلا الموضوع طلع "أغنى" و أكبر من كدة كتير ....( طبعا مع كامل الاحترام لكل المدونات السياسية و الادبية)
أجمل حاجة في البلوجرز انهم على طبيعتهم جدا ...ماحدش بيصطنع حاجة او بيكتب كلام لمجرد ان الناس تقول فلان كتب حاجة حلوة أو وحشة ...كل واحد بيكتب الحاجة اللي بيحسها بجد ..من غير كدب او تجميل ...باختصار ,المشاعر الانسانية في أسمى صورها ...كنت باحس كتير جدا و انا بقرا بعض الposts اني مسكت حتة من روح اللي كاتب دة و عمال اتأمل فيها ......لدرجة اني فعلا ماكونتش باعرف اللي كاتب دة عندة كام سنة اصلا ...لأ و الأكتر من كدة ..انا فعلا و الله ماكنتش باعرف دة ولد ولا بنت ولا راجل ولا ست اللي كاتب ...لأن فعلا كل واحد بيكتب اللي حاسه بجد ...و الأحاسيس و المشاعر الحقيقية مالهلش ولا عمر ولا نوع ......دية أحاسيس أنسانية ...الحاجة الي ربنا كرمنا و ميزنا بيها عن أي حاجة تانية !
انا يمكن باقول كلام كبير شوية بس حقيقي فعلا انا متأثر جدا بكل حرف قريتة في البلوجز اللى زرتها ..لانها حسسيستني يعني ايه فعلا ان الواحد يبقى بني ادم ..بغض النظر عن روحه و شكله و سنه و حتى نوعه ..............
أحب أشكر كل مدون ...اللي شفت المدونة بتاعتة واللي ماشوفتهاش و اعبر عن أد اية أنا فعلا سعيد أني دخلت عالم "انساني" زي دة !
0 comments:
Post a Comment